Ақмола облысының Зерендi ауданында 400 басқа арналған тауарлы сүт фермасы ашылды. Бұл туралы өңір әкімдігінің баспасөз қызметі хабарлады.
Еленовка ауылында сүт фермасын ашу жөніндегі инвестициялық жобаны Agro Milk Project компаниясы жүзеге асырды.
«Қолда бар ірі қараның жалпы саны шамамен 440 бас. Бір тәулікте 4 тоннаға жуық сүт өндіріледі, жазға қарай өнімді 6–6,5 тоннаға дейін арттыруды, ал келесі жылы 8 тоннаға дейін жеткізуді жоспарлап отырмыз. Болашақта ферманы кеңейту мақсатында қосымша сиыр қорасы мен бұзаулар тұратын екі орын салынады», — деді Agro Milk Project компаниясының директоры Юрий Швец.
Өндірілген сүт Milk Project қайта өңдеу зауытына жеткізіледі.
Әкімдік өкілдері атап өткендей, фермадағы мал қазақстандық шаруашылықтардан сатып алынған.
«Сиырлар “Родина” агрофирмасынан және басқа да отандық ауыл шаруашылығы құрылымдарынан жеткізілді. Жалпы, мал шаруашылығы жобаларын жүзеге асыру — астананы азық-түлікпен қамтамасыз ететін белдеуді қалыптастыруға бағытталған», — деді фермаға барған Ақмола облысының әкімі Марат Ахметжанов.
Ақмола облысында Солтүстік Қазақстан облысының тәжірибесіне сүйене отырып әзірленген агроөнеркәсіп кешенді несиелендіру бағдарламасы аясында 2023–2025 жылдары жеті тауарлы фермасы қаржыландырылған, олардың алтауы іске қосылған.
Сурет: Agrotrend.kz
