Моңғолиядан Қазақстанға қой және түбіт жүнді ешкілерді импорттау бастамасы қолға алынып жатыр. Абай облысы әкімінің орынбасары Думан Оспанов, сондай-ақ Қазақстанның Ветеринариялық бақылау және қадағалау комитетінің өкілдері Моңғолияға іссапармен барып, эпизоотиялық ахуалды зерделеді, мал тасымалдау жөнінде келіссөздер жүргізді.
Делегация өкілдері іссапар аясында Моңғолияның бірқатар аймағын аралады. Жергілікті қой тұқымы жайында мамандардан толыққанды ақпарат алды. Сондай-ақ, түбіт жүнді ешкі өсіретін шаруашылықтардың және жүн өңдейтін кәсіпорынның жұмысымен танысты.
Айта кетейік, жақында ғана Ауыл шаруашылығы министрі Айдарбек Сапаров Моңғолияның Қазақстандағы Төтенше және Өкілетті Елшісі Доржийн Баярхуумен кездесіп, тараптар агроөнеркәсіп кешен саласындағы ыпалдастықтың басым бағыттарын талқылаған болатын.
Сурет: Agrotrend.kz
