Биыл Ақмола облысының егіс алқаптарына 37 мың ауыл шаруашылығы техникасы шығады. Аймақта жаздық егіс алқабы 5,5 млн гектарға жоспарланған. Оның 4,6 млн гектарына дәнді дақылдар, 570 мың гектарына майлы дақылдар, 370,4 мың гектарына мал азығы дақылдары егіледі. Бұл туралы облыс әкімінің қатысуымен өткен көктемгі егін егу жұмыстарына дайындық кеңесінде айтылды, деп хабарлады аймақ әкімдігінің баспасөз қызметі.
«Ауыл шаруашылығы тауарын өндірушілер 539,8 мың тонна тұқыммен, дизель отынымен және минералдық тыңайтқыштармен қамтамасыз етілген. Егіс науқанына шамамен 37 мың бірлік техника тартылады, олардың бүгінгі күнгі дайындығы 82 пайыз, сәуір айының ортасында 100 пайызға жеткіземіз. “Кең Дала 2” бағдарламасы аясында 145 шаруашылықтың көктемгі егіс жұмыстарын қаржыландыруға 15,4 млрд теңге бөлінді», – деді Ауыл шаруашылығы және жер қатынастары басқармасының басшысы Нұрбек Бадырақов.
Сонымен қатар аймақта пайдаланылмай жатқан жерлерді қайтару және қайта бөлу жұмыстары жалғасуда. Биыл 90 мың гектар жерді мемлекет меншігіне қайтару жоспарланып отыр.
«Көктемгі егіс жұмыстарымен қатар, Ерейментау ауданының якорлық жобаларына сүйене отырып, ет және сүт бағытындағы мал шаруашылығын дамытуды жалғастыру қажет. Сондай-ақ цифрландыру басқармасы да шет қалмауы тиіс. Егіс алқаптарын мониторингтеу дрондардың көмегімен жүргізіледі», – деді облыс әкімі Марат Ахметжанов.
Кеңес қорытындылаған аймақ басшысы мүдделі мемлекеттік органдарға бірқатар тапсырма берді.
Сурет: Agrotrend.kz
