Абай облысы әкімінің орынбасары Думан Оспанов Аякөз ауданына жұмыс сапарымен барып, бірқатар шаруа қожалықтарының қызметімен танысты.
Алдымен Айғыз ауылдық округіне қарасты «Сопы» шаруа қожалығына аялдады. Мұнда 600 бас ірі қара және 650 бас қазақы қой өсіріледі. Шұбартау өңірінің табиғи жайылымын тиімді пайдаланып отырған шаруашылық қойын қыс бойы жайып шығады. Малшысы еңбекқор, малы күйлі қожалық қыстан аман шығып, көктемде жақсы төл алуға үміттеніп отыр. Облыс әкімінің орынбасары бастаған топ осы ауылдық округтегі «Дәулет» шаруа қожалығының жағдайымен де танысып, ары қарай Өркен ауылына ат басын бұрды.
Өркен ауылына қарасты «Бақдәулет» шаруашылығы жұмысын жолға қойған өңірдегі іргелі қожалықтардың бірі. Мұнда 3 мың бас қазақтың қылшық жүнді қойы өсіріледі. Жазда жайлауға, күзде күзекке көшіп, қыста арнайы сақталған жайылымға малын көктемге дейін бағады. Жайылымын жыл мусымына қарай жоспарлап, өрісін тиімді пайдаланып отырған шаруашылықтың да шөбі қалың, қой қоңды.
Аякөз ауданының Шұбартау өңірі қой шаруашылығымен айналысушылар үшін өте тиімді. Өйткені, отар қыста қолға қарамай, күйлі күйінде жайылыммен шығады. Қар жұқа, күн жылы, шөп қалың, артық жұмысшы күші де қажет емес. Осылайша, қоңды қойлары қораға кешке ғана оралатын шаруашылықтар мал басын көбейтіп, игі істерін кеңейтуді жоспарлап отыр.
Думан Оспанов шаруалардың жағдайларын сұрап, мәселелерін тыңдады. Сондай-ақ мал шаруашылығын дамыту мақсатындағы мемлекеттік қолдау шараларын түсіндірді.
Сурет: Agrotrend.kz
