Абай облысының Ақсуат ауданында 5 мың бас ірі қараға арналған заманауи мал бордақылау алаңы пайдалануға берілді. Бұл туралы Ауыл шаруашылығы министрлігінің баспасөз қызметі хабарлады.
Нысан «Мәуліт» шаруа қожалығының базасында іске қосылды. Шаруа қожалығы 3 850 гектар аумақта орналасқан және заманауи ауыл шаруашылығы техникасымен толық қамтамасыз етілген.
Жобаның негізгі бағыттарының бірі – жергілікті тұрғындар мен жеке қосалқы шаруашылықтардан бұзаулар қабылдау. Бұл ауыл тұрғындарының табысын арттырып, оларды агроөнеркәсіп кешенінің өндірістік тізбегіне тартуға мүмкіндік береді.
Қазіргі уақытта бордақылау алаңына 1 200 бас еркек тайынша қойылған.
Сурет: АШМ
