Үкіметтің кезекті отырысында елдегі су шаруашылығының қазіргі жағдайы мен 2026-жылғы вегетациялық кезеңге дайындық шаралары қаралды. Вице-премьер Қанат Бозымбаев оңтүстік өңірлерде су тапшылығы жалғасып жатқанын атап өтті.
Мәліметке сай, Шардара су қоймасына келетін ағын 43%-ға азайған, Нарын–Сырдария каскадындағы қор былтырға қарағанда 3,8 млрд текше метрге төмен. 2026-жылғы болжамды су түсімі 1–1,5 млрд текше метр болуы мүмкін, бұл 1 млрд текше метр тапшылық қаупін тудырады. Жамбыл облысында су қоймаларының толымдылығы – 41%.
Сонымен бірге, су үнемдеу технологиялары қолданылатын алаң 543,5 мың гектарға жетіп, жыл сайын орташа 150 мың гектарға артып келеді. 2026–2028 жылдары су үнемдеу жобаларын қолдауға 228,1 млрд теңге бөлінеді.
Көшпелі кеңестер қорытындысы бойынша Үкімет бірнеше тапсырма берді:
-
Екі апта ішінде өңірлер су пайдалану лимиттерін нақтылап, дақылдарды егу жоспарын бекітеді;
-
2026-жылдың 1-ақпанына дейін ең төмен су келу сценарийіне арналған лимиттер ұсынылады;
-
1-наурызға дейін суды көп қажет ететін дақылдарды егу су лимиттеріне қарай түзетіледі;
-
Әр облыста 100 гектарда ылғалды ұстайтын инновациялық препараттар сыналады;
-
«Қазсушар» су беру келісімшарттарын тек бекітілген лимиттер бойынша жасайды;
-
2026-жылы суды заңсыз пайдалануды жою жоспары әзірленеді.
Сурет: Agrotrend.kz
