Үкімет астық экспорттаушыларды қолдау үшін қосымша 7 млрд теңге бөлді. Қаражат көлік шығындарын субсидиялаудың қолданыстағы бағдарламасы бойынша мемлекеттің міндеттемелерін толық орындауға, сондай-ақ басымдыққа ие шетелдік нарықтарға жеткізуді одан әрі ынталандыруға бағытталады. Бұл туралы Ауыл шаруашылығы министрлігінің баспасөз қызметі хабарлады.
Қосымша қаржыландыру қажеттігі дәнді дақылдар өнімділігінің жоғарылығы мен шетелдік сатып алушылар тарапынан қазақстандық астыққа деген сұраныстың артуына байланысты туындап отыр.
Биыл көлік шығындарын субсидиялауға Үкімет резервінен 31 млрд теңге бөлінді. Бұл қаражат отандық өнімнің жаңа экспорттық бағыттарға шығуын, бұрынғы нарықтарға қайтадан қол жеткізуді және баламалы логистикалық маршруттар бойынша алыс шет елдерге экспорт көлемін ұлғайтуды қамтамасыз етті. Жүзеге асырылған шаралардың қорытындысында жаңа және қалпына келтірілген нарықтарға астық жеткізу көлемі 2,5 млн тоннадан асты.
Сурет: Agrotrend.kz
