Абай облысы әкімінің орынбасары Думан Оспанов жұмыс сапарымен Аягөз ауданына барып, өңірдің ауыл шаруашылығы бағытындағы атқарылып жатқан жұмыстармен танысты. Бұл туралы аудан әкімдігінің баспасөз қызметі хабарлады.
«Сапар аясында ол ауданның бірқатар шаруа қожалықтарының жетекшілерімен кездесіп, ауыл шаруашылығы өнімдерінің сапасын арттыру, асыл тұқымды мал шаруашылығын дамыту және саланың тиімділігін жоғарылату мәселелеріне ерекше мән берілетінін айтты», — делінген әкімдік таратқан ақпаратта.
Думан Оспанов асыл тұқымды қой өсірумен айналысатын «Жас Талап» шаруа қожалығына барды. Онда асыл тұқымды Еділбай қойының санын көбейтіп, сапасын жақсарту жайымен танысты. Сонымен қатар 500 басқа арналған ірі қара мал бордақылау алаңын аралап көрді.
Сондай-ақ, облыс әкімінің орынбасары «Таза Қазақстан» бағдарламасы аясында ауыл әкімдерімен арнайы жиын өткізіп, елді мекендердегі санитарлық талаптардың сақталуын қамтамасыз ету, экологиялық мәдениетті көтеру жөнінде тапсырмалар берген.
Сурет: аудан әкімдігі
