22–24 қазан күндері Астанадағы «EXPO» халықаралық көрме орталығында Орталық Азиядағы ең ірі аграрлық іс-шаралар – ExpoGroup халықаралық көрме компаниясы ұйымдастырған KazAgro және KazFarm-2025 көрмелері өтеді, деп хабарлады Ауыл шаруашылығы министрлігі.
Іс-шараға 25 елден 300-ден астам компания қатысады деп күтілуде. Германия, Чехия, Австрия, Беларусь, Иран, Ресей және Қытай сияқты елдер өздерінің ұлттық стендтерін ұсынады. Көрмеде агроөнеркәсіп кешеніндегі ең жаңа жетістіктер – егіншілікке арналған дрондардан бастап, өнімділікті бақылайтын интеллектуалды жүйелер мен роботтандырылған техникаға дейін таныстырылады.
KazAgro/KazFarm-2025 аясында мазмұнды іскерлік бағдарлама өтеді: салалық конференциялар, панельдік пікірталастар, семинарлар, сондай-ақ халықаралық сарапшылардың қатысуымен B2B және B2G форматындағы кездесулер ұйымдастырылады.
Іскерлік күн тәртібінің негізгі тақырыптары: аграрлық білім берудің заманауи тәсілдері, климаттың өзгеруі жағдайында мал азығын өндіру, мал шаруашылығын цифрландыру және автоматтандыру, ветеринария мен биологиялық қауіпсіздікті дамыту.
Көрменің басты бағыттарының бірі – жастарды қолдау және агроинновацияларды дамыту. Елдің аграрлық жоғары оқу орындарының қатысуымен AgroHackathon өткізіледі. Онда студенттер «ақылды» егіншілік, агробиотехнология, өнімділікті цифрлық бақылау және орнықты ауыл шаруашылығын дамыту бойынша стартап-жобаларын ұсынады. Ең үздік идеялар инвесторлар мен сарапшылардың қолдауына ие болып, коммерцияландыру мүмкіндігіне ие болады.
Сонымен қатар, QazTrade компаниясы арнайы экспорттық аймақ ұйымдастырады. Онда қазақстандық фермерлер мен өңдеушілер шетелдік серіктестермен тікелей кездесіп, келісімдер жасай алады. Бұл «Қазақстанда жасалған» брендімен отандық өнімдерді халықаралық нарықтарға шығаруға мүмкіндік береді.
Сурет: Agrotrend.kz
