Астанада астық пен бұршақ дақылдарын терең өңдейтін агроөнеркәсіп кешенінің құрылысы басталды, Ауыл шаруашылығы министрлігінің баспасөз қызметі.
Кешенді Kazakh Protein компаниясы жүзеге асыруда. Ол түркиялық Tiryaki Agro Holding холдингі, қазақстандық «Қазақстанның Астық консорциумы» ЖШС және «ADOtex» ЖШС серіктестігінде құрылған. Бұл жоба елдің агроөнеркәсіп кешенінің дамуындағы жаңа кезеңді білдіреді және Қазақстанның инновациялық технологияларға, экологиялық тұрақтылыққа және халықаралық әріптестікке негізделген қосылған құн тізбегін қалыптастыру жөніндегі стратегиялық бағытын толықтай айқындайды.
Жобаның инвестиция көлемі 320 млн доллар.
Капсула салу рәсіміне Ауыл шаруашылығы министрі Айдарбек Сапаров, Астана қаласының әкімі Жеңіс Қасымбек, іскер топтар өкілдері, сарапшылар қауымдастығы қатысты.
Министр жобаның ұлттық азық-түлік қауіпсіздігі мен аграрлық сектордың экспорттық әлеуетін нығайтудағы маңызды рөлін атап өтті:
«Мемлекет басшысы өз Жолдауында ауыл шаруашылығы өнімдерін терең өңдеудің маңыздылығына, оған отандық әрі шетелдік инвесторларды тарту қажеттігіне ерекше назар аударған болатын. Бүгін біз осы саладағы ең ірі жобалардың бірін іске қосып отырмыз. Бұл жоба жыл сайын 250 мың тонна астық пен 80 мың тонна бұршақ дақылдарын қайта өңдейді. Соның нәтижесінде қосымша экспорттық мүмкіндіктер ашылып, жоғары табысты өнімдер өндіріледі әрі Қазақстанның аграрлық дербестігіне қарай маңызды қадам жасалады. Бұл кешен халықаралық ынтымақтастықтың жарқын үлгісіне айналатынына және Қазақстан мен Түркия арасындағы стратегиялық серіктестіктің жаңа кезеңін ашатынына сенемін», – деді Айдарбек Сапаров.
Жоба екі кезеңмен жүзеге асырылады: 2027 жыл – жылдық қуаттылығы 250 мың тонна болатын бидайды терең өңдеу желісін іске қосу; 2028 жыл – жылдық қуаттылығы 80 мың тонна болатын бұршақ дақылдарын өңдеу желісін пайдалануға беру.
Нәтижесінде кешен глютен, крахмал, лизин, өсімдік протеин изоляттары, құрама жем және басқа да жоғары қосылған құнды ингредиенттердің кең ауқымын өндіреді. Өнім ішкі нарыққа да жеткізіліп, ТМД елдеріне, Еуропалық одаққа, Солтүстік Америкаға және Оңтүстік-Шығыс Азияға экспортталатын болады.
Сурет: АШМ
