Ауыл шаруашылығы министрі Айдарбек Сапаров Freedom Holding Corp. компаниясының негізгі акционері әрі бас директоры Тимур Турловпен кездесті, деп хабарлады министрліктің баспасөз қызметі.
Кездесу барысында тараптар агроөнеркәсіптік кешенді қаржыландыруды дамыту мәселелерін, соның ішінде агробизнесті несиелеу, агросақтандыру және ауыл шаруашылығына цифрлық шешімдерді енгізу жолдарын талқылады.
Тимур Турлов холдингтің мемлекеттік аграрлық саясатты жүзеге асыруға белсенді қатысуға мүдделі екенін атап өтті. Атап айтқанда, бұл Freedom Finance Insurance сақтандыру компаниясы қатысып отырған қолданыстағы агросақтандыру тетігі арқылы іске асырылуда.
Ерекше назар отандық ауыл шаруашылығы тауар өндірушілерін ұзақ мерзімді жеңілдетілген несиелермен қамтамасыз ету мүмкіндіктеріне, сондай-ақ сауда желілері мен фермерлік шаруашылықтарды біріктіретін, ауыл шаруашылығы өнімдерін жеткізуге арналған цифрлық платформаны дамытуға аударылды. Аталған платформа өткізу нарығына ыңғайлы әрі ашық қолжетімділікті қамтамасыз етпек.
Кездесу қорытындысы бойынша тараптар аграрлық секторды қолдаудың негізгі бағыттары бойынша жұмысты жалғастыруға уағдаласты. Негізгі екпін тұрақты қаржыландыруға, цифрландыруға және агроазық-түлік нарығы инфрақұрылымын дамытуға қойылды.
