Ақмола облысында егін ору науқаны басталды. Фермерлерді ерте қаржыландырудың арқасында биыл аймақта егін бітік шыққан. Агротехнологияны дұрыс қолданғандар гектарына 40 центнерден өнім алуды жоспарлап отыр. «Бәйтерек» холдингінің еншілес компаниясы Аграрлық несие корпорациясы биыл егін егетін 7 542 фермерге «Кең дала» және «Кең дала 2» бағдарламалары арқылы 496 млрд теңгенің жеңілдетілген несиесін берген. Соның ішінде Ақмола облысының мыңға жуық фермері 117 млрд теңгеге қол жеткізген.
Солардың қатарында Бұланды ауданына қарасты Алтынды ауылындағы «Даниловское и К» ЖШС бар. Компания 18 гектарға бидай, арпа, сұлы, зығыр, жасымық және мал азығы үшін судан шөбін еккен. Серіктестік егін шаруашылығымен қатар мал шаруашылығын да дамытып отыр. Атап айтқанда, қазақтың ақбас тұқымды сиырын өсірумен айналысады.
«Кең дала бағдарламасы өте тиімді. Өйткені қаражатқа уақытында қол жеткіземіз. Соның арқасында тұқымдарды, қосалқы бөлшектерді, тыңайтқыштарды бағасы шарықтамай тұрғанда сатып аламыз. Күзде қаржылық жүктеме де аз болады. Бұл бағдарлама егін егетін фермерлерге өте тиімді әрі ыңғайлы», — дейді «Даниловское и К» ЖШС бас директоры Айбат Есентұров.
Айта кету керек, «Кең дала» бағдарламасы бойынша бөлінген қаржыны фермерлер Корпорация филиалдарынан, екінші деңгейлі банктерден, микроқаржы ұйымдарынан, әлеуметтік-кәсіпкерлік корпорациялардан, несие серіктестіктерінен және аймақтық инвестициялық орталықтардан ала алады.
Мәселен, «Астам Агро» шаруа қожалығы қаржыны «Степняк» несие серіктестігі арқылы алып, бидай мен зығыр еккен.
«Астам Агро шаруа қожалығы 2023 жылы «Степняк» несие серіктестігіне кірген. Міне 2 жыл қатарынан несие алып келеді. Қаржы Аграрлық несие корпорациясы арқылы беріліп жатыр. Біздің несие серістестігіміз 2013 жылы құрылған, содан бері Аграрлық несие корпорациясымен тығыз жұмыс істеп келеміз», — дейді «Степняк» несие серіктестігінің басқарма төрағасы Қажығали Имантаев.
Жоғарыдай айтқанымыздай, көктемгі егіс жұмыстарын ерте қаржыландыру фермерлер үшін өте тиімді. Биыл да келесі жылдың егіс науқанынан ерте қаржыландыру жоспарланып отыр.
«Ерте қаржыландыру шаруа қожалықтарына көктемгі егін егу жұмыстары үшін тұқым, жанар-жағар май, қосалқы бөлшектер қажет ресурстарды тиімді бағада сатып алуға мүмкіндік береді. Мемлекет жыл сайын жеңілдікпен берілетін қаржы көлемін арттып келеді. Келесі жылдың көктемгі егіс науқанын ерте қаржыландыру биыл жыл соңында басталады», — дейді «Аграрлық несие корпорациясы» АҚ Ақмола облысы филиалының директоры Дархан Тапанбаев.
Жеңілдетілген несиеден бөлек, кепіл мүлік мсәлесі де шешімін тапқан. Қаржыландыруға қолжетімділікті арттыру мақсатында егін егетін фермерлер несие сомасының 85%-ына дейін кепілдік алу тетігі пайдалана алады. Биыл «Даму» кәсіпкерлікті дамыту қоры арқылы 193 млрд теңгенің 1 309 кепілдігі берілген.
Суреттер: Agrotrend.kz
