Павлодар облысының аумағында жер ресурстарын зерттеу жұмысы басталды, деп хабарлады 24 KZ.
Бұл жұмыстар Екібастұз қаласының ауылдық округтерінде, Баянауыл, Тереңкөл, Железин және Май аудандарында жүреді. Шамамен 707 мың гектар жер зерттеледі. Оның ішінде 642 мың гектар алқаптың құнарлығы тексеріледі. Мамандар топырақты ауыл шаруашылығы мақсатында қолдануға бола ма соны анықтайды. Мұндай зерттеулер ауыл шаруашылығын тиімді ұйымдастырып, жерді мақсатты пайдалануға мүмкіндік береді. Сонымен қатар 808 мың гектар аумақта геоботаникалық зерттеулер жүріп жатыр. Яғни мал азығына қажетті өсімдіктердің құрамы мен жайылымдардың сапасы тексеріледі.
«Геоботаникалық зерттеу бізде Май, Баянауыл, Ақтоғай және Ертіс аудандарының жерлерінде өтеді. Қазіргі уақытта мемлекет электрондық жер-кадастрлық карта құрып жатыр. Бұл зерттеудің нәтижелері барлығы сол картаға кіреді», деді облыстық жер қатынастары басқармасының басшысы Мұрат Хамитов.
