Мемлекет басшысының Түркия Республикасына ресми сапары аясында Қасым-Жомарт Тоқаев Tiryaki Holding компаниясының Бас атқарушы директоры Сүлеймен Тирьякиоғлуды қабылдады. Кездесуде агроөнеркәсіп саласындағы әріптестік мәселелері талқыланды.
Мемлекет басшысы компанияның Астанада бидай мен бұршақты дақылдарды терең өңдейтін зауыт салу туралы шешімін құптады. Инвестиция туралы келісімге Ауыл шаруашылығы министрі Айдарбек Сапаров пен Сүлеймен Тирьякиоғлу қол қойды, деп хабарлады Ауыл шаруашылығы министрлігінің баспасөз қызметі.
Ірі инвестициялық жоба ауыл шаруашылығы шикізатын жоғары технологиялық деңгейде өңдеуді дамытуға, аграрлық өнімдердің қосылған құнын арттыруға және Қазақстанның экспорттық әлеуетін күшейтуге бағытталған.
Кешеннің құрылыс алаңы 65 гектар болады. Жобаның бірінші кезеңінде жылына 250 мың тонна бидай өңделеді, екінші кезеңінде жылына 80 мың тонна бұршақ дақылдарын өңдеу жоспарланған. Жалпы инвестиция көлемі 160 млрд теңге.
Сурет: АШМ
