Абай облысының әкімі Берік Уәли Жарма ауданындағы «Нұркелді» ауыл шаруашылық өндірістік кооперативінің жұмысымен танысты, деп хабарлады аймақ әкімдігінің баспасөз қызметі.
«Нұркелді» шаруа қожалығы – Жарма ауданындағы ірі агроөнеркәсіптік құрылымдардың бірі.
Жергілікті кәсіпкер Мұхтар Тойқылды басқаратын шаруашылықта биыл 2 мың гектардан астам алқапқа дәнді, майлы дақылдар мен жоңышқа егілген. 800 гектар алқапқа тамшылатып суару технологиясы енгізілген. Бұл әдіс суды үнемдеуге мол мүмкіндік береді.
«Бұрын бір құлақ сумен бір гектарды ғана суаратын болсақ, қазір дәл сол мөлшермен 70-80 гектар жерді қамти аламыз», – дейді шаруашылық басшысы.
Ауыл шаруашылығы өндірістік кооперативі 10 жылдық ауқымды инвестициялық жобаны қолға алып отыр. Жетекші елдердің заманауи ауыл шаруашылығы техникасын сатып алған. Өндірілген өнімнің бір бөлігі күзде Қытай нарығына жөнелтіледі.
Сондай-ақ шаруашылық жоңышқа өңдеп, түйіршіктелген құрама жем өндіретін шағын зауытты іске қосқан. Өнімнің бір бөлігі Қытайға экспортталады. Кәсіпкер аудан тұрғындарына қажетті көкөніс, жүгері, күнбағыс, қауын-қарбыз және картоп өсірумен айналысып келеді.
Қазіргі таңда шаруашылықта 35 адам тұрақты жұмыс істейді. Маусымдық кезеңде жұмысшылар саны 50-ден 100 адамға дейін артады. Шаруашылық басшысы алдағы уақытта қытайлық инвесторлармен бірлесіп май зауытын салуды да жоспарлап отыр екен.
Егіс алқаптарын көрсету барысында Мұхтар Тойқылды аймақ басшысына қосымша жер телімін беру жөнінде өтініш айтты. Оның бүгінде игеріп отырған жер көлемі шамамен 2 мың гектар. Болашақта 5 мың гектарға дейін ұлғайтпақ.
Облыс әкімі шаруашылыққа әкімдік тарапынан тиісті көмек көрсетілетінін айтты.
«Ауыл шаруашылығын дамытуға үлес қосып жатқан азаматтарға заң аясында қолдау жасалуы керек. Аудан басшылығына кәсіпкерлік және жер қатынастары басқармасымен бірлесіп осы мәселені шешуді тапсырамын. Кәсіпкерге қажетті құжаттарды дайындауға көмектесіңіздер. Өнім өндіріп, халықты жұмыспен қамтып отырған осындай азаматтарға қолдау көрсетуіміз керек», – деді Берік Уәли.
Сурет: облыс әкімдігі
