Ақмола облысының Ерейментау ауданында “BIG FARM” ЖШС ірі мал шаруашылығы кешені салынады. Жоба бойынша 32 мың гектардан астам аумақта тауарлы сүт фермасы, бордақылау алаңы, ет пен сүт өңдеу зауыты, сондай-ақ заманауи суару жүйесі салынады. Бұл туралы өңірдің ауыл шаруашылығы басқармасының баспасөз қызметі хабарлады.
Бірінші кезеңде 2 мың басқа арналған тауарлы сүт фермасының құрылысын жүргізеді, кейін тағы кеңейтіп 5 мың басқа дейін жеткізбек.
Жоба аясында 10 мың басқа арналған бордақылау кешені құрылып, ауыл шаруашылығы өнімдерін қайта өңдеу цехтары іске қосылады. 250 тұрақты жұмыс орны ашылады деп жоспарлануда.
Естеріңізге сала кетейік, жоба шетелдік инвесторлардың — португалдық AGROCEPHALUS, LDA компаниясының және бірқатар испандық жабдық өндіруші компаниялардың, асыл тұқымды мал, құрама жем және биогаз қондырғыларын жеткізушілердің қатысуымен жүзеге асырылуда. Жобаның құны 132 млн еуро.
Сурет: Agrotrend.kz
