Қазақстан ара шаруашылығы өнімдерін экспорттау әлеуетін дамыту жолында маңызды қадам жасады. Шығыс Қазақстан облысының Глубокое ауданындағы «SUN-BEE ALTAI» ЖШС ара шаруашылығы өнімі мен бал өндіруші кәсіпорын ретінде еліміздің атынан алғашқы болып Еуропалық Одақтың ресми тізіліміне – Honey and other apiculture products establishments (HON) енгізілді. Бұл туралы Ауыл шаруашылығы министрлігінің баспасөз қызметі хабарлады.
Бұл жетістік Ауыл шаруашылығы министрлігінің, Ветеринариялық бақылау және қадағалау комитетінің және кәсіпорынның өндірістік үдерістерді Еуропалық Одақтың ветеринариялық-санитариялық талаптары мен стандарттарына толық сәйкестендірудегі көпжылдық жүйелі жұмыстарының нәтижесінде іске асты.
Қазақстаннан балды Еуропалық Одақ елдеріне экспорттау мүмкіндігі 2025 жылғы 21 ақпандағы Еуропалық комиссияның қаулысы жарияланғаннан кейін 2025 жылдың 12 наурызынан бастап ресми түрде ашылды.
«SUN-BEE ALTAI» ЖШС-нің HON тізіліміне енгізілуі кәсіпорынға Германия, Франция, Италия, Бельгия, Нидерланды, Австрия, Испания, Польша, Чехия, Словакия, Словения, Латвия, Литва, Эстония, Венгрия, Финляндия, Швеция, Дания, Португалия, Грекия, Болгария, Румыния, Хорватия, Ирландия, Кипр, Люксембург және Мальта мемлекеттеріне экспорт жасау құқығын береді.
Комитет алдағы уақытта да Қазақстанның ара шаруашылығы өнімдерін экспорттау әлеуетін арттыру мақсатында еуропалық нарыққа шығуға мүдделі кәсіпорындарға қолдау көрсетіп, тиісті жұмыстар жүргізуді жалғастырады.
Сурет: Agrotrend.kz
