Алматы облысында «Қапшағай бидай өнімдері» ЖШС-нің өндірістік алаңын жаңғырту жұмыстары басталып, үш жаңа зауыттың құрылысы қатар жүргізілуде. Жоба бірнеше бағытты қамтиды: өсімдік майын, бидай және құрама жем ұнын өндіру. Бұл туралы Ауыл шаруашылығы министрлігінің баспасөз қызметі хабарлады.
Жобаның құны — 8 млрд теңге. Кәсіпорын ішкі нарықтағы маңызды ойыншылардың біріне айналып, өнімін шетелге, ең алдымен Қытайға экспорттауды жоспарлап отыр.
Қазіргі уақытта қоймалар, терминалдар мен өндірістік корпустардың құрылысы, теміржол жолдарын жаңғырту жұмыстары жүргізілуде. Кешенді биыл іске қосу жоспарланған. Жылдық экспорт көлемі 1 млн тонна өнімге жетеді деп күтілуде.
Жобаның ерекшелігі — орау жұмыстарының толықтай автономды болуы: аумақта қаптар шығаратын желілер орнатылған.
Бұл жоба Қонаев қаласының инвестициялық пулына енгізілген, бүгінде оның құрамында жалпы инвестиция көлемі 2,4 трлн теңгені құрайтын 39 жоба бар. Осы жобаларды жүзеге асыру нәтижесінде 17 000-нан астам тұрақты жұмыс орны құрылмақ. Қазіргі таңда Қонаев қаласында 12 өнеркәсіптік кәсіпорын жұмыс істейді, ал қолға алынған бастамалар өңірдің өндірістік әлеуетін едәуір арттырмақ.
Сурет: АШМ
