Қазақстанда ауыл шаруашылығы техникасын жаңарту деңгейі 2024-жылы 5,5%-ды құрады. Агроөнеркәсіптік кешенді дамытудың 2021-2030 жылдарға арналған Тұжырымдамасында өткен жылы техниканы жаңартудың 5,2% мөлшеріндегі нысаналы индикаторы белгіленген. 2025- жылға арналған жоспар – паркті 6,5% жаңарту, деп хабарлады Ауыл шаруашылығы министрлігінің баспасөз қызметі.
«ҚазАгроҚаржы» АҚ ақпаратына сәйкес 2024-жылдың қорытындысы бойынша фермерлер жалпы сомасы 227,5 млрд теңге болатын 10,5 мың ауыл шаруашылығы техникасын лизингке сатып алды. Бұл алдыңғы жылғы сатып алу көлемінен 41%-ға жоғары (2023 жылы – 7460 бірлік). Жалпы республика бойынша фермерлер (өз қаражаты, лизинг және несиелендіру есебінен) 22,1 мың бірлік әртүрлі ауыл шаруашылығы техникасын сатып алды, бұл алдыңғы жылғы деңгейден 13%-ға артық (2023 жылы 19,6 мың бірлік). Яғни техникаларды жаңарту деңгейі 5,5%-ға жетті деген сөз», — делінген Ауыл шаруашылығы министрлігінің Тұжырымдаманы іске асыру туралы есебінде.
Сонымен қатар, өздігінен жүретін ауыл шаруашылығы техникасы паркіне түгендеу жүргізілуде. Ондағы ақпараттық жүйеде 1940-1990 жылдары шығарылған көптеген тракторлар мен комбайндар көрсетілген. Бұл техниканың көп бөлігі әлдеқашан істен шыққан. Талдау нәтижелері бойынша Ауыл шаруашылығы министрлігі әкімдіктерге 25 жылдан асқан техникаларға түгендеу жүргізудің нысаналы индикаторларын жеткізді.
«2024-жылдың қорытындысы бойынша жергілікті атқарушы органдар 54 210 бірлік трактор мен 9031 бірлік комбайнға түгендеу жүргізді. Оның нәтижесі бойынша өздігінен жүретін ауыл шаруашылығы техникасының қоры өзектендірілетін болады», — деп хабарлады министрлік.
Сурет: Agrotrend.kz
