Ауыл шаруашылығы министрлігі үйірлі шегіртке зиянкестері ошақтарын анықтау және жою жұмыстарын жалғастыруда, деп хабарлады ведоствоның баспасөз қызметі.
Бүгінгі таңда шегірткенің таралуы Жамбыл және Түркістан облыстарында тіркелген. Фитосанитарлық іс-шаралар барысында 535,04 мың гектар жер тексеріліп, оның 227,7 мың гектарында зиянкестердің бары анықталды. Оның ішіндегі экономикалық зияндылық шегінен асатын аумақ 195,5 мың гектарды құрады.
189,1 мың гектар жер өңделді. Атап айтқанда Жамбыл облысында – 0,7 мың гектар, Түркістан облысында – 188,4 мың гектар.
Жұмысқа 287 дана арнайы бүрку техникасы, 4 ұшақ және 980 маман тартылды. Өңдеу агротехникалық тұрғыдан тиімді мерзімде жүргізілуде.
Қабылданған шаралардың нәтижесінде ауыл шаруашылығы дақылдарына келетін зиянның алдын алуға мүмкіндік жасалды және шегірткелердің көршілес мемлекеттердің шекаралас аумақтарына өтуіне жол берілмеді.
Болжам бойынша Қазақстан аумағында үйірлі шегірткелердің таралуы мүмкін жер көлемі 2,1 млн гектар, бұл өткен жылдың осы кезеңімен салыстырғанда 1 млн гектарға аз.
Шегірткемен күрес іс-шараларына тағы 443 дана бүрку техникасын жұмылдыру жоспарланып отыр. Өңірлерде жедел штабтар құрылып, іс-шара жоспарлары мен жол карталары әзірленді.
Барлық жұмыстар Ауыл шаруашылығы министрлігінің тұрақты бақылауында.
Сурет: АШМ
