2025-жылғы 16 сәуірдегі Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның шешімімен малдың терісі мен жүнін экспорттауға салынатын кедендік баж салығын алып тастау мақұлданды, деп хабарлады Ауыл шаруашылығы министрлігінің баспасөз қызметі. Бұл жеңілдік үш жыл мерзімге енгізіліп, кейін қайта қаралатын болады.
Шешімнің басты себебі — өндірілетін шикізаттың едәуір бөлігі ішкі нарықта сұранысқа ие емес. Атап айтқанда, тері мен жүнді өңдеу және экспорттау әлі де төмен деңгейде қалып отыр.
Ауыл шаруашылығы тауарын өндірушілерді ынталандыру және өңдеу кәсіпорындарының жүктемесін қамтамасыз ету мақсатында, өңдеуге өткізілген шикізатқа субсидия беру арқылы мемлекеттік қолдау шаралары қарастырылып жатыр.
Тері мен жүнге салынатын экспорттық баж салығын алып тастау ең алдымен ірі және ұсақ мал өсіретін фермерлердің шығындары мен қалдықтарды жоюға жұмсалатын шығындарды азайтуға, өндірістік-бөлу тізбектерін дамытуға, өткізу нарықтарын кеңейтуге, сондай-ақ ауыл шаруашылығы шикізатын өндіруші және экспорттаушы отандық кәсіпкерлердің бәсекеге қабілеттілігін арттыруға ықпал етеді.
Қазіргі таңда ҚР Ұлттық экономика министрінің 2016-жылғы 27-ақпандағы бұйрығына сәйкес, қолданыстағы экспорттық баж салығы мөлшері мынадай:
•ірі және ұсақ мал терілері мен басқа да өңделмеген терілердің экспортына — тоннасына 200 еуро;
•жүн экспортына — 10%, бірақ тоннасына кемінде 50 еуро.
Ішкі нарық қажеттілігі мен тері-жүн экспорты арасындағы теңгерімді сақтау мақсатында Ауыл шаруашылығы министрлігі жағдайды тұрақты бақылауда ұстап отырады және қажет болған жағдайда өңдеу саласындағы инвестициялық жобаларды ескере отырып, тиісті шараларды жедел түрде қабылдайды.
Сурет: АШМ
