Президенттің агроөнеркәсіп кешеніндегі қайта өңделген өнім үлесін 70%-ға дейін арттыру жөніндегі тапсырмасы аясында Солтүстік Қазақстан облысында 34 млрд теңге көлеміндегі ірі инвестициялық жоба жүзеге асырылды, деп хабарлады Ауыл шаруашылығы министрлігінің баспасөз қызметі.
Петропавл қаласында «Масло-Дел» ЖШС майлы дақылдарды қайта өңдейтін май экстракциялау зауыты салынды. Кәсіпорынның жылдық өңдеу қуаты 400 мың тоннаға дейін жетеді, ол заманауи еуропалық қондырғылармен жабдықталған және толық автоматтандырылған.
Зауытта күнбағыс, рапс және зығыр майы, сондай-ақ жоғары ақуызды мал азығы қоспалары – күнжара мен шрот өндіріледі. Көктемде экстракция желісін іске қосу жоспарланса, 2025-жылдың соңына дейін тамақ өнеркәсібінде сұранысқа ие лецитин өндіруге арналған өсімдік майынқайта терең өңдеу цехы ашылады. Өндірісте жергілікті ауыл шаруашылығы өндірушілерінің шикізаты пайдаланылады.
Май экстракциялау зауытының іске қосылуының арқасында өңір өз өнімін толықтай қайта өңдей алады. 2024-жылы СҚО-да 780 мың тонна майлы дақыл жиналды, ал өңдеу кәсіпорындарының жалпы қуаты енді 813 мың тоннаға жетті.
Биыл егіс алқаптарын әртараптандыру аясында майлы дақылдардың егістік көлемі 85 мың гектарға ұлғайып, 760 мың гектарға жетеді.
Сурет: АШМ
