Ауыл шаруашылығы министрлігі, Сауда және интеграция министрлігі, Құс өсірушілер одағы, жұмыртқа өндірушілердің салалық қауымдастығы және Сауда желілері одағы әлеуметтік маңызы бар азық-түлік тауарларының бағасын тұрақтандыру шараларын жүзеге асырудағы ынтымақтастық туралы Меморандумға қол қойды, деп хабарлайды Ауыл шаруашылығы министрлігінің баспасөз қызметі.
Меморандумның негізі — тараптардың баға тұрақтылығын қамтамасыз етуге деген өзара мүдделілігі мен бизнестің әлеуметтік жауапкершілігін арттыру.
Жергілікті өндірушілерді қорғау үшін ауыл шаруашылығы министрлігі тағамдық жұмыртқаны сырттан кіргізуге шектеу енгізу мәселесін қарайды және Сауда және интеграция министрлігімен бірлесіп, заңсыз жеткізілетін импортты тағамдық жұмыртқаны сатуға жол бермеу үшін бақылау шараларын қабылдайды.
Құс өсірушілер одағы мен қауымдастық құс фабрикаларының қоймаларынан, сондай-ақ олардың фирмалық дүкендерінен сату бағасының тұрақтылығын қамтамасыз етуге міндеттеме алды.
Өз кезегінде, сауда желілері одағы сауда желілерінің қолданыстағы заңнамаға сәйкес шекті сауда үстемесінің мөлшерін сақтауын қамтамасыз етеді және осы санаттағы жұмыртқаларды сату сыйақысын өндіріп алу фактілеріне жол бермейді.
