Үкімет отырысында Ауыл шаруашылығы министрі Айдарбек Сапаров егіс жұмыстарын жүргізу үшін өңірлерге 401 мың тонна дизель отыны бөлінгенін және бұл 2024 жылғы деңгейден 6,5%-ға артық екенін айтты.
Сондай-ақ министр әкімдіктердің жедел ақпараты бойынша ауыл шаруашылығы техникасының дайындығы шамамен 75% құрайтынын жеткізді. Көктемгі егіс жұмыстарының алдында бұл көрсеткіш 100%-ға жетеді, деген жоспар бар. Осыған байланысты аймақ әкімдіктеріне техниканы жөндеу жұмыстарын күшейту және машина-трактор шеберханаларының үздіксіз жұмыс істеуін қамтамасыз ету тапсырылды.
Мемлекеттік қолдау шараларының арқасында 2024 жылы фермерлер 22 мың заманауи техника сатып алғаны айтылды. Жыл қорытындысы бойынша ауыл шаруашылығы техникасы паркін жаңарту деңгейі 5,5%-ды құрады.
«Бұл көктемгі егіс және егін жинау кезеңіндегі еңбек өнімділігіне тікелей әсер етеді. Биыл біздің алдымызда осы көрсеткішті 6,5%-ға жеткізу міндеті тұр, бұл, әрине, ауыл шаруашылығы өндірісінің тиімділігін арттыруға ықпал етеді», — деді министр.
Жалпы, еліміздің ауыл шаруашылығы құрылымдарында 140 мың трактор, 5,5 мыңға жуық өнімділігі жоғары егіс кешендері, 76,4 мың сепкіш және 220 мың топырақ өңдеу құралдары бар.
Сурет: Agrotrend.kz
