Түркістан облысында өндіріс орындарын ашу, инвестиция тарту бағытындағы жұсыстар жалғасуда. «Қарқын Трейд» ЖШС биыл күзде Түлкібас ауданының Жабағылы ауылының маңынан жылына 100 мың тонна құс етін өндейтін өндіріс нысанының құрылысын бастауды жоспарлап отыр, деп хабарлайды облыс әкімдігінің баспасөз қызметі.
Ауданның басты даму жоспарына енген жалпы құны 28 млрд. теңгені құрайтын жоба 2025-2026 жылдарға жоспарланған. Бұл жерде өндіріс ошағы негізгі төрт бөліктен тұрады. Онда құс ұстау орны, жем шығаратын цех, балапан шығаратын орын (инкубатор) және қасапханасы болады. Кәсіпорын толық іске қосылғанда 268 адам жұмыспен қамтылады деп күтілуде.
Кәсіпкелермен жобаны егжей-тегжейлі талқылаған аудан басшысы ол жердегі ашылатын жаңа жұмыс орындарының 95 пайызына жергілікті тұрғындарды жұмыспен қамтуды ескертті. Жауапты мамандарға осы бастан қажетті инфрақұрылыммен (су, электр желісі) қамту жағын пысықтауды тапсырды.
Жоба иелерінің қосымша жер телімін қарастырып беру мәселесін назарға алып, бүгінгі таңда бөлінген 104 гектар жерге құрылыс жұмыстарын бастай беру керектігін атап өтті.
Айта кетейік, өндіріске жұмысқа қабылданған азаматтар сол мекеме тарапынан мамандығына қарай арнайы курстардан өтеді.
