Целиноград ауданының «Родина» Агрофирмасы» ЖШС-де Қазақстанда ғана емес, Орта Азияда да баламасы жоқ сауу цехын іске қосты деп хабарлайды Ауыл шаруашылығы министрлігінің ресми сайты.
Іс-шараға ауыл шаруашылығы вице-министрі Аманғали Бердалин мен облыс әкімінің орынбасары Мұрат Балпан қатысты.
Кешенді іске қосу – Президенттің өңделген ауыл шаруашылығы өнімдерінің үлесін 70%-ға дейін ұлғайту жөніндегі тапсырмасын іске асырудағы маңызды қадам.
Шведтік DeLaval брендінің роботты сауу карусельді жүйесі бір дегенде 80 бас, 5 сағатта 2000 сиыр саууға мүмкіндік береді. Бір ауысымда тек 12 адам жұмыс істейді.
Бұл іс-шаралар Ақмола облысына тауарлық сүт өндірісін 40 мың тоннаға немесе 1,5 есеге, 90 мың тоннадан 130 мың тоннаға дейін ұлғайтуға жол ашады. Осылайша, елорда тұрғындарын 50%-ға сүт өнімдерімен қамтамасыз ете алады.
Өткен жылы 4,9 мың басқа арналған бес ірі тауарлы сүт фермасы ашылды. Биыл 1,2 мың басқа арналған тағы 2 ферма іске қосылады.
Сурет: АШМ
