Ауыл шаруашылығы вице-министрі Аманғали Бердалин «KazBeef» ЖШС кәсіпорнының қызметімен танысты, деп хабарлады Ауыл шаруашылығы министрлігінің баспасөз қызметі. Кәсіпорын «алаңнан сөреге дейін» толық өндірістік циклды жүзеге асырады: асыл тұқымды мал өсіруден бастап етті өңдеуге дейінгі барлық кезеңдерді қамтиды.
Аманғали Бердалин жоғары өнімді асыл тұқымды ангус сиырларын өсіруге маманданған мал репродукторын аралап, жануарларды өсіру процесімен, азықтандыру рационымен және малды ұстау шарттарымен танысты.
Репродукторда 1 200 ірі қара мал (ІҚМ) бар.
15 000 басқа арналған толық цифрландырылған бордақылау алаңы жұмыс істейді, онда 11 000 ірі қара бар.
Вице-министр компания басшылығымен ветеринариялық қауіпсіздік, дайын өнімнің өзіндік құнын төмендету және жануарлардың денсаулығын жақсарту мәселелерін талқылады.
2020-жылдан бастап «KazBeef» ЖШС-ға Feedlot Health Management Service (FHMS) компаниясы малды азықтандыру және олардың жағдайын бақылау мәселелері бойынша кеңес беріп келеді. Мал орта есеппен 250-300 күн бордақыланады. Америкалық диетологтар әзірлеген рацион үш кезеңнен тұрады: 6 айға дейін сүтпен қоректендіру, 10-12 айға дейін жаю, 550 кг салмаққа жеткенше теңгерімді астықпен бордақылау.
Келесі нысан – «KazBeef Processing» ет өңдеу кешені болды. Бұл кәсіпорын 2018 жылдан бастап салқындатылған және мұздатылған өнімдер, соның ішінде жартылай фабрикаттар, қосымша өнімдер, тартылған ет және бургерге арналған котлеттер шығарады. Кешеннің өндірістік қуаты тәулігіне 150 бас ірі қараның етін өндіруге жетеді. Өнімдер Қазақстанның ішкі нарығына жеткізіледі, сондай-ақ Парсы шығанағы елдеріне және Орталық Азияға, оның ішінде БАӘ мен Өзбекстанға экспортталады.
Компания басшылығымен өткен кеңесте Мемлекет басшысының ауыл шаруашылығы өнімдерін терең өңдеуді дамыту және экспорт нарығын кеңейту жөніндегі тапсырмасын орындау аясында өндіріс көлемін ұлғайту жоспарлары талқыланды. Вице-министр өндірістің барлық кезеңдерінде, соның ішінде мал сою мен өңдеуде жоғары ветеринариялық қауіпсіздік стандарттарын сақтау қажеттігін атап өтті.
Сурет: АШМ
