Азық-түлік қауіпсіздігі саласындағы өзара іс-қимылды және АӨК саласындағы ынтымақтастықты дамытуды Ауыл шаруашылығы министрі Айдарбек Сапаров пен Тәжікстан Үкіметі жанындағы Мемлекеттік материалдық резервтер жөніндегі агенттіктің директоры Нурмахмад Ахмадзода талқылады. Келіссөздердің басты тақырыбы астық экспортын ұлғайту мәселесі болды. Бұл туралы ҚР Ауыл шаруашылығы министрлігінің баспасөз қызметі хабарлады.
Тәжікстан қазақстандық астық үшін дәстүрлі өткізу нарығы болып есептеледі. ҚТЖ деректері бойынша 2024-жылы Қазақстан Тәжікстанға шамамен 1,3 млн тонна астық экспорттаған. Оның ішіндегі 633 мың тонна күздегі өнімнің астығы. Жаңа өнім экспортының өсімі 2023 жылдың сәйкес кезеңімен салыстырғанда 57% құрады.
«Біз қарқынды арттырып, экспорт көлемін ұлғайтуымыз керек. Сондай-ақ, ұнды жеткізуді реттеуді ұсынамыз.Ынтымақтастық үшін барлық жағдайды жасауға дайынбыз», — деді Айдарбек Сапаров.
Сондай-ақ, тәжік тарапы өкілдерін қант, өсімдік майы, ет жеткізу көлемін ұлғайту мәселелері қызықтырды.
Ауыл шаруашылығы министрі жан-жақты көмек көрсетуге дайын екенімізді білдірді.
Айдарбек Сапаров аталған бастамаларды іске асыру сауда-экономикалық ынтымақтастықты кеңейту үшін мүмкіндіктер ашатынын және Орталық Азия өңірінің азық-түлік тұрақтылығын арттыруға ықпал ететінін атап өтті.
Сурет: АШМ
