2023 жылы қазақстандық «QVM Technology», «Ordabasy Group» және «Ервира» компаниялары грузиялық «Olive Georgia» компаниясымен бірлесіп, Жетісу, Түркістан және Маңғыстау облыстарында зәйтүн ағаштарының көшеттерін тәжірибелік отырғызу туралы келісімге қол қойды, деп хабарлайды Ауыл шаруашылығы министрлігінің баспасөз қызметі.
Алғашқы 6080 көшет отырғызылды. Алдын ала мәлімет бойынша, көшеттердің 99,7%-ы жақсы өміршеңдік деңгейін көрсетті. Алғашқы өнім 5 жылдан кейін жиналады.
2024-жылдың көктемінде Испания мен Түркиядан әкелінген көшеттер отырғызылды.
2025-жылдың соңына дейін қазақстандық компаниялар 1000 гектар аумаққа зәйтүн ағашының көшеттерін егеді.
Жоба аясында ғылыми қолдау көрсету қарастырылған: Испанияның Кордова университетінің профессоры Пабло Мореллоның жетекшілігімен топырақ, климат және метеорологиялық деректерді жинау және талдау жүргізілетін болады.
«QVM Technology» ЖШС 2030-жылға қарай зәйтүн өңдеу және зәйтүн майын өндіру зауытын іске қосуды жоспарлап отыр.
Сурет: АШМ
