Қостанай облысында ауыл шаруашылығы өнімдерін қайта өңдеуді дамыту жөніндегі Кешенді жоспар аясында нақты шаралар қабылдануда, деп хабарлады Ауыл шаруашылығы министрлігінің баспасөз қызметі.
Мәселен, 2023 жылы өңдеу саласында аймақта жылына 170 мың тонна бұршақ дақылдарының жармасын өндіру жобасы іске асырылды. Бұл жобаға «КАЙДЗЭН» ЖШС 9 млрд теңге инвестиция салды. «S-Agro-Borovskoe» компаниясы 40 тонна құрғақ бие сүтін өндіруді жолға қойды.
Биыл «Аруана-2010» ЖШС жылына 90 мың тонна ұн өндіретін жаңа диірмен кешенін іске қосты. Жыл соңына дейін жылына 10 мың тонна ірімшік өндіретін зауыт пайдалануға беріледі. Бұл жобаға «МИЛХ» ЖШС 7,2 млрд теңге инвестиция жұмсады.
Аймақта бұл бағыттағы жұмысты күшейту жоспарланып отыр: 2026 жылы «AC Agro» ЖШС жылына 100 мың тонна бұршақ дақылдарын қайта өңдейтін зауытты іске қосуды жоспарлауда. Жобаның құны – 24 млрд теңге.
2027 жылға қарай «Qostanai Grain Industry» ЖШС астықты терең өңдеу жобасын іске асырады. Жылына 415 мың тонна астықты қайта өңдеу арқылы глютен, крахмал, амин қышқылдары, биоэтанол және басқа да өнімдер өндіру қолға алынады. Жобаға 70 млрд теңге инвестиция салынады.
Жалпы, 2027 жылға дейін Қостанай облысында аграрлық сектордың барлық саласында 96 инвестициялық жоба жүзеге асырылмақ. Оның ішінде, мал шаруашылығында – 32, өсімдік шаруашылығында – 47, ауыл шаруашылығы өнімдерін қайта өңдеуде – 17 жоба бар. Жалпы инвестиция көлемі 232 млрд теңгені құрайды. 2 мыңнан астам жаңа жұмыс орны ашылады.
Сурет: АШМ
