Түркістан облысында 2023-жылдан бері банан өсіретін бірегей жылыжай кешені жұмыс істеп келеді, деп хабарлады Ауыл шаруашылығы министрлігінің баспасөз қызметі. Жобаны «GenGroupKazakhstan» компаниясы жүзеге асырды. Ол заманауи жылыжайларды құрумен айналысады және әртүрлі ауыл шаруашылығы дақылдары мен тропикалық жемістер өсіреді.
Инвесторлар Түркияның ауыл шаруашылығын дамыту тәжірибесін зерттеді. Бұл ретте климаттық жағдайларға төзімділік мәселелеріне ерекше назар аударылды. Ауа райы жағдайлары мен топырақтың сипаттамаларын мұқият талдағаннан кейін Түркістан облысының Сайрам ауданында банан өсіру туралы шешім қабылдаған.
5 гектар алқаптағы алғашқы жылыжай 2023-жылдың маусымында пайдалануға берілді. 2024 жылдың мамыр айының соңында алғашқы өнімдер жиналды.
Қазіргі уақытта «GenGroupKazakhstan» компаниясы қызанақ пен құлпынай өсіретін жаңа жылыжай кешенін салуды жоспарлап отыр. Ауданы 6 гектар болатын жаңа жылыжай 3 мың тонна қызанақ, 130 тонна құлпынай өсіруге бағытталған. Жобаның жалпы құны 13,4 млрд теңгеге бағаланады, ал жобаларды іске асыру 2025-жылдың соңына дейін аяқталады.
Сондай-ақ, қазіргі уақытта 10 гектар ашық жерге манго, авокадо және көкжидек өсіру жобасы әзірленуде.
Сурет: АШМ
