Павлодар облысында өңірдің ең ірі тауарлы сүт фермаларына арналған баспасөз туры өтті. Іс-шара Солтүстік Қазақстан облысының тәжірибесін тарату бағдарламасы аясында ұйымдастырылып, мемлекеттік қолдау арқылы іске асырылып жатқан сүт-тауарлы фермаларын құрудағы үздік тәжірибелермен бұқаралық ақпарат құралдарының өкілдерін таныстыруға бағытталды. Бұл туралы Ауыл шаруашылығы министрлігінің баспасөз қызметі хабарлады.
Бірінші нысан – 2014 жылдан бастап мал шаруашылығы мен егіншілік бағытында табысты жұмыс істеп келе жатқан «Кронос-Павлодар» ЖШС. Мемлекеттік «Жол картасы» бағдарламасы аясында мұнда 1 893 басқа арналған тауарлы сүт фермасының құрылысы жүзеге асырылуда. Қазіргі уақытта 1 440 басқа арналған бірінші кезең пайдалануға берілді, оның ішінде 890-ы асыл тұқымды ірі қара. Шаруашылықтың жер қоры 2 421 гектар, оның 848,5 гектары суармалы алқаптар.
Фермада заманауи жабдықтар орнатылған: сауу залдары, пастеризаторлар, бұзау бокстары және автоматтандырылған азықтандыру жүйелері. Жем-шөп дақылдарының тұрақты өнімділігін қамтамасыз ету үшін ZIMMATIC маркалы 10 жаңбырлатып суару жүйесі қолданылады.
Келесі нысан – 5,2 млрд теңгелік инвестициялық жобаны іске асырып жатқан «Agro-Trade PV» компаниясы. Бұл кәсіпорын – өңірдегі сүтті мал шаруашылығы саласының көшбасшыларының бірі. Ферма 1 620 басқа есептелген, оның ішінде 1 127-і голштин-фриз тұқымды сиырлар. Кәсіпорынның жылдық сүт өндірісі көлемі – 4 млн литр. Жер қоры – 2 232 гектар, оның 1 634 гектары – суармалы жер.
Фермада GRIMME, John Deere, KUHN, Valley сынды әлемдік жетекші өндірушілердің техникасы қолданылады. Жобаны жаңғыртудың екінші кезеңі аясында 2023-жылы Венгриядан 204 бас асыл тұқымды ірі қара мал әкелінді. 2024-жылдың қазан айында 432 басқа арналған жаңа нысандардың құрылысы аяқталды.
2023-жылы агроөнеркәсіп кешенді мемлекеттік қолдау аясында Павлодар облысына 10 млрд теңге бөлініп, 4,4 мың басқа арналған 6 инвестициялық жоба жүзеге асырылды. 2025-жылы 1 980 басқа арналған екі жаңа жобаны 2,15 млрд теңгеге қаржыландыру жоспарлануда.
ҚР Ауыл шаруашылығы министрлігі азық-түлік қауіпсіздігін қамтамасыз ету, ауылдық аумақтарды дамыту және отандық агроөнеркәсіп кешенінің тиімділігін арттыруға бағытталған инвестициялық бастамаларға жан-жақты қолдау көрсетуді жалғастырады.
Сурет: АШМ
