Қазақстанда 2025 жылы етті мал шаруашылығында австралиялық тәжірибеге негізделген 10 жоба іске асырылуда. Олардың жалпы құны 27,4 млрд теңгеге бағаланады. Алдын ала есептеулер бойынша бұл кәсіпорындар 500 млрд теңгенің әлеуетті түсімімен 50 мың тоннаға дейін ет экспортын қамтамасыз етеді. Бұл туралы ҚР үкіметінің баспасөз қызметі хабарлады.
Естеріңізге сала кетейік, австралиялық мал шаруашылығы әдісі жайылымдарды тиімді пайдалануды, жем-шөп қорын қамтамасыз етуді, аралас жем-шөпті пайдалана отырып, мал бордақылау әдісін іске асыруды көздейді.
Қазақстанда етті мал шаруашылығын қолдау үшін саланы жеңілдікпен несиелендірудің жаңа бағдарламалары әзірленді. Үкімет отырысында Ауыл шаруашылығы вице-министрі Аманғали Бердалин етті мал шаруашылығын қолдау үшін жылдық сыйақы мөлшерлемесі 5 пайыз болатын несиемен қамтамасыз етілетінін жүргізілетінін айтты. Бұл несие өнімі фермерлерге асыл тұқымды аналық мал басын сатып алуға мүмкіндік береді. Бұл өнімділікті, ет сапасын және төлдің өсімін арттыру үшін өте маңызды.
Сондай-ақ ет комбинаттары мен бордақылау алаңдары үшін – айналым қаражатын толықтыруға несие беріледі. Шарттардың ішінде – малдың кемінде 70%-ын отандық ет комбинаттарына сату және өңдеушілерде терең өңдеу желісінің болуы талап етіледі.
Әкімдіктердің, «Атамекен» ҰКП және ветеринариялық қызметтің қатысуымен жүргізілген комиссиялық тексеру нәтижелері бойынша 128 бордақылау алаңының 28-і, 36 ет комбинатының – 24-і талаптарға сәйкес келеді.
«Осылайша, фермерлерден бордақылау алаңдарына, одан әрі ет комбинаттары мен экспорттық нарықтарға дейін өндірістік тізбек қалыптасады. Әр кезеңде айналым қаражатының болуы қосылған құны жоғары өнім шығаруды қамтамасыз етуге мүмкіндік береді», — деп атап өтті Аманғали Бердалин.
Мал шаруашылығының сүт бағытын дамыту да басымдыққа ие болып қала береді. 2023 жылы 100 млрд теңгеге 69 тауарлы сүт фермасының құрылысы қаржыландырылды. Күтілетін өндіріс көлемі – 423,7 мың тонна сүт. Оның ішінде 39 ферма іске қосылды, қалған 30-ы биыл жыл соңына дейін аяқталады.
Премьер-министрдің орынбасары – ұлттық экономика министрі Серік Жұманғарин жеңілдетілген несиелендіруге үміткер барлық жобалардың белгіленген критерийлерге сәйкестігін талдауды тапсырды. Ол сондай-ақ шұжықтар, ірімшіктер, ашытылған сүт өнімдері және импорттың жоғары үлесі сақталатын басқа да тауарлар сияқты импортқа тәуелді өнімдерге назар аудару қажеттігін айтты.
Сурет: Agrotrend.kz
