Премьер-министр Жамбыл облысындағы жүгеріні терең өңдеу зауытын салу жөніндегі инвестициялық жобаның құрылыс алаңына барды. Инвестиция көлемі $800 млн-ды құрайды. Өндірістік қуаты алғашқыда жылына 1 млн тонна болса, кейін оны 3 млн тоннаға дейін жеткізетін өнеркәсіп паркін құру жоспарлануда. Бұл туралы Ауыл шаруашылығы министрлігінің баспасөз қызмет хабарлады.
Жобаны биоферментация индустриясындағы әлемдік көшбасшы – қытайлық Fufeng Group компаниясы іске асыруға кіріскен. Өнеркәсіп кешен құрамына крахмал зауыты және үш биоферментация кәсіпорны кіреді. Зауыттан лизин, глутамин, глутамин қышқылы, лейцин, треонин, жем және тағы да басқа жоғары қосылған құны бар өнімдер шығарылады деп күтілуде.
Өнеркәсіп паркінің қажеттіліктерін қамтамасыз ету үшін инвестор көмір жылу электр стансасы мен ағынды суларды тазарту стансасын салуды да жоспарлап отыр. Ары қарай тұз қышқылы мен сұйық аммиакты қоса алғанда, химиялық компоненттер шығаратын зауытты іске қосу қарастырылғаны айтылды. Негізгі нысандарды пайдалануға беру 2026-жылға жоспарланған. 1,5 мыңға жуық жұмыс орны ашылмақ.
Олжас Бектенов бұл жобаны жүзеге асыру ауыл шаруашылығы өнімдерін қайта өңдеу деңгейін арттыруда, экспорттық әлеуетті дамытуда және заманауи агротехнологияларды тартуда маңызды қадам болатынын айтты.
Сурет: АШМ
