2030 жылға қарай Жамбыл облысында жылына 1 млн тоннаға жуық премиум маркалы фосфор тыңайтқыштарын өндіру жоспарланып отыр. Бұл туралы облыс әкімі Ербол Қарашөкеев мәлім етті, деп хабарлады ҚазАқпарат агенттігі.
«Облыс экономикасының 19% үлесі өнеркәсіп өндірісіне тиесілі, оның ішінде өңдеу өнеркәсібі секторының үлесі – 65,4%. Жыл басынан бері 727,8 млрд теңгеге өнеркәсіп өнімі өндірілді. Өңдеу өнеркәсібі бойынша негізгі өсімді химия және құрылыс индустриясы қамтып отыр. Еліміздің жалпы химия саласы өнімінің шамамен 24%-ы біздің облыста өндіріледі. Химия кәсіпорындары республика бойынша 100% фосфор, 81% минералды тыңайтқыштар шығарады. Облыста 13 млрд тонна қоры бар 48 фосфорит кен орны шоғырланған», — деді Ербол Қарашөкеев облыстың әлеуметтік-экономикалық дамуы туралы есеп беру барысында.
Өңір әкімінің айтуынша, жыл басынан бері салада 212 млрд теңгеге химия өнімі шығарылып, экспорт көлемі 77%-ға жетті.
«2030 жылға қарай тыңайтқыштардың премиум маркалары (суда еритін фосфор тыңайтқыштары) мен құндылығы жоғары өнімдерді жылына 1 млн тоннаға дейін өндіруді жоспарлап отырмыз. Бұл жобалар аясында өңірге 1 млрд АҚШ доллары көлемінде инвестиция тартылады», — деді облыс басшысы.
https://kaz.inform.kz/news/fosfor-tinaytkishi-ondrsne-1-mlrd-dollar-investitsiya-tartamiz-erbol-karashokeev-20a85c/
Сурет облыс әкімдігінің баспасөз қызметінен
