Қостанай облысының жер ресурстарын басқару департаменті Жітіқара ауданының прокуратурасымен және ішкі істер органдарымен бірлесіп жайылымдық жер учаскесінде заңсыз алтын өндіру фактісінің жолын кесті, деп хабарлады Ауыл шаруашылығы министрлігінің баспасөз қызметі.
Тексеру барысында жауапкершілігі шектеулі серіктестіктің ауыл шаруашылығына арналған жер учаскесін иеленгені анықталды. Алайда, жер иесі оны мақсаты бойынша пайдаланудың орнына, топырақты жуу әдісі арқылы заңсыз бағалы металдар өндірумен айналысқан.
Аумақты тексеру кезінде арнайы техника, металл іздегіштер және пайдалы қазбаларды заңсыз өндіруге арналған басқа да құралдар табылған. Сонымен қатар, құнарлы топырақ қабатының жойылғаны анықталды.
Осыған байланысты департамент тарапынан серіктестікке 2,6 млн теңге көлемінде айыппұл салынды. Сондай-ақ, заңсыз әрекеттердің салдарынан бұзылған құнарлы топырақ қабатын қалпына келтіру міндеттелді.
Сурет: АШМ
