Елімізде «Сheese open 2024» халықаралық ірімшік байқауы өтті. Оған Абай облысынан ірімшік жасау шебері Екатерина Паязитова қатысып, өнімі «Қазақстанның үздік ірімшігі» атағына ие болды, деп хабарлады Абай облысы әкімдігінің ресми сайты.
Байқау 2 кезең бойынша өтті. Оған Лоран Дюбуа бастаған Халықаралық қазылар алқасының мүшелері баға беріп, ең үздік 10 ірімшік түрін таңдап алды. Жеңіске жеткен өнімдер алтын, күміс және қола медальдармен марапатталды.
Жарысқа Франциядан да қонақтар келді. Сондай-ақ, байқауға халықаралық ірімшік гильдиясының президенті Ролан Бартелеми, Халықаралық ірімшік өндірушілер гильдиясының мүшесі, Париждегі 4 ірімшік дүкенінің иесі Лоран Дюбуа және т.б. төрелік етті.
Екатерина Паязитова 2023 жылы да үлкен жетістікке қол жеткізген еді. Өткен жылдың қыркүйек айында Тур қаласында өткен «Le Mondial du fromage» халықаралық байқауына қатысқан ол ірімшік гильдиясының құрметті мүшесі болып, әлемдік деңгейде танылды. Екатеринаның ендігі мақсаты — ірімшік цехын кеңейту және облыста ірімшік дайындау ісін одан әрі дамыту.
Сурет облыс әкімдігінің сайтынан
