Абай облысының Үржар ауданында 2023-жылдан бері «Ауыл аманаты» бағдарламасы арқылы 70 жоба жүзеге асырылып, 80-нен астам жаңа жұмыс орны ашылған. Бұл бағдарлама аудан тұрғындарының тұрмысын жақсартып, ауыл кәсіпкерлігін дамытуға зор мүмкіндік беріп келеді, деп хабарлады аймақ әкімдігінің баспасөз қызметі.
Бағдарламаға қатысушылардың бірі – Бестерек ауылында тұратын жеке кәсіпкер Сайлаугүл Сағатбекова. Ол жеңілдетілген несие алып, түшпара түйетін цех ашқан.
Бүгінгі таңда ісі ілгері басқан цех басшысы Бестерек ауылының үш тұрғынын тұрақты жұмыспен қамтып отыр. Өндіріс орнында дайындалатын өнімдер сапа талаптарына сай әзірленіп, аудан тұрғындарына қолжетімді бағамен ұсынылуда. Мемлекеттік бағдарламаның шарапатын көрген кәсіпкер алдағы уақытта өндіріс көлемін ұлғайтып, өнім түрлерін көбейтуді жоспарлап отыр.
Сурет: ашық ақпарат көзі
