Түркістан облысының Мақтаарал ауданындағы «Қылышбек» шаруа қожалығында ерте пісетін қырыққабаттың алғашқы өнімі жиналып, Ресейге экспортқа жіберілді. Бұл туралы өңірлік әкімдіктің баспасөз қызметі хабарлады.
«Пекинка» сұрпын өсірген қожалық басшысы Сейсенбай Мусирманкуловтың айтуынша, шаруашылыққа тиесілі 9 гектар жердің 4 гектарына қырыққабат егілген. Егіс барысында заманауи тамшылатып суғару технологиясы қолданылып, өнім сапасы мен өнімділігін арттыруға ерекше мән берілген.
Қазіргі таңда қырыққабаттың бір келісі 200 теңгеден саудалануда. Жалпы өнім көлемі шамамен 120 тонна болады деп күтілуде. Өнімді тасымалдау «Агрогруз» компаниясы арқылы жүзеге асырылуда.
Жалпы алғанда, биылға болжамдық егіс құрылымына сәйкес, Мақтаарал ауданы бойынша көкөніс дақылдары 1 404 гектар алқапқа егіледі деп жоспарланған, оның ішінде қырыққабат 1 016 гектарға егілмек. Бүгінгі күнге дейін ерте пісетін қырыққабат 827 гектар аумаққа егіліп, алғашқы өнімдер нарыққа жол тартты.
«Аудан фермерлері негізінен «Ринда», «Пекин» және «Пандион» сияқты салмағы 1-ден 1,5 кг-ға дейін тартатын қырыққабат сұрыптарын таңдаған. Бұл өнімдерге әсіресе Еуропа елдері мен Ресей нарығында сұраныс жоғары. Бұл ретте жергілікті шаруалар ішкі нарықты да толық қамтамасыз етуге қауқарлы», — делінген әкімдік таратқан ақпаратта.
Ерте пісетін қырыққабат жиналғаннан кейін фермерлер бақша, мақта, жүгері және басқа да дақылдарды егуге кіріседі. Осылайша жылына екі, кейде үш өнім алуға болады.
Өткен жылы Мақтаарал ауданында 520 гектар жерге қырыққабат егілсе, нәтижесінде 11 мың тоннаға жуық өнім жиналған, оның басым бөлігі Ресей және Беларусияға экспортталған.
Сурет: облыс әкімдігі
