«Ecoculture-Eurasia» ЖШС жылыжай кешені Орталық Азиядағы агроөнеркәсіп сектордың ең технологиялық нысандарының бірі болуға үміткер. Жалпы аумағы 52 гектарға жуық жылыжай кластері жылына 27 мың тонна көкөніс өндіруге есептелген. Бұл туралы Ауыл шаруашылығы министрлігінің баспасөз қызметі хабарлады.
Жылыжайлар толық технологиялық цикл принципімен жабдықталған, бұл оңтүстік өңірдің климатына тән елеулі температуралық ауытқулар кезінде де өндірістің тұрақтылығын қамтамасыз етеді.
Қазан айында «Климон F1» қызанақ сортының алғашқы көшеттері 6,25 гектар аумаққа отырғызылды. Алғашқы өнім 2026-жылдың ақпанында жиналады.
Болашақта ассортимент 12 қызанақ сортына дейін кеңейтіледі, оның ішінде сүйір және черри түрлері бар.
Дайын өнім ішкі нарыққа да, экспортқа да шығарылады. Ресейге, Сібір мен Қиыр Шығысқа жөнелтіледі.
Жобаның құны 42 млрд теңге. Биыл 21 гектар жылыжайды пайдалануға беру жоспарланған. Жобаның серіктесі – ресейлік «ЭКО-культура» агрохолдингі.
Сурет: АШМ
