Биыл Қазақстан шетелге 800 тоннаға жуық банан экспорттаған. Жалпы құны 231 мың доллар. Бұл көрсеткіш 2024 жылдың сәйкес кезеңімен салыстырғанда 2,9 есеге артқан. Бұл туралы Tradereport.Kz тelegram-арнасы хабарлады.
Экспорттың негізгі бөлігі көрші елдерге бағытталған. Атап айтқанда, Ресейге 229,5 тонна, Өзбекстанға 545,8 тонна банан экспортталған.
Айта кетейік, Қазақстанда бананды өнеркәсіптік деңгейде өндіру Түркістан облысында жолға қойылған. Мұнда туркиялық технологиялармен жабдықталған жылыжайларда бананның «Анамус» сорты өсіріледі. Атауы «банандардың анасы» деп аударылатын бұл сорт 5,3 гектар аумақты қамтып жатыр. Алғашқы өнім 2024 жылы жиналған.
Жобаны «GenGroupKazakhstan» компаниясы жүзеге асыратынын, кәсіпорынның заманауи жылыжайлар құрумен айналысатынын және түрлі ауыл шаруашылығы дақылдары мен тропикалық жемістер өсіретіні туралы бұдан бұрын жазған едік.
Сурет: ашық ақпарат көзі
