Маңғыстау облысында 95 мың басқа жуық түйе бар. Түйе сүтін терең өңдеу және дайын өнімді сыртқы нарыққа шығару бағытында үш ірі инвестициялық жоба іске асады. Сонымен қатар, биыл облыста түйе сүтін автоматтандырылған әдіспен сауатын заманауи цех іске қосылған. Бұл туралы облыс әкімі Нұрдәулет Қилыбай Астанада өткен брифингте айтты.
Жалпы алғанда, 2025-жылы Маңғыстау облысында ауыл шаруашылығы саласында 38 млрд теңгеге жуық соманың өнімі өндіріліп, мал шаруашылығы өнімінің көлемі 22,4%-ға артқан. Бұл көрсеткіштерде түйе шаруашылығының үлесі басым.
Сондай-ақ жергілікті өнімдердің қолжетімділігін арттыру мақсатында өңірде сыйымдылығы 4 мың тонна болатын көкөніс сақтау қоймасы салынып жатыр. Ал 2025–2027 жылдары агроөнеркәсіп кешенін дамыту аясында жалпы құны 23,6 млрд теңге болатын 15 инвестициялық жоба іске асырылмақ.
Бұдан бөлек, ветеринариялық инфрақұрылымды жетілдіру мақсатында облыста 43 ветеринариялық пункт пен 1 ветеринариялық станция пайдалануға беріледі.
Сурет: ашық ақпарат көзі
