Маңғыстаудың қуаң даласына үйренген, шөлге мықты түйе түлігі – осы өңірдің табиғатына бейім жануар. Бүгінде бұл кәсіпке жас та болса жаңаша серпін беріп отырған азаматтың бірі – Емір ауылындағы Ескендір Сардабеков. Жас кәсіпкер «Маңғыстау медиа» веб-сайтының тілшісіне берген сұхбатында түйе шаруашылығын қалай түрлендіріп отырғанын айтқан.
32 жастағы шаруа түйе бағумен 2012 жылдан бері айналысып келеді екен. Бұл кәсіпті өзі бастаған жоқ, әкесінің ісін жалғаған. Бала күнінен малдың жайына қаныққан Ескендір түйелерін асылдандыруды қолға алыпты.
Қорасында 60-тан астам асыл тұқымды түйесі бар. Шаруашылығын кеңейтіп, бір кәсіптің айналасынан бірнеше бағытта табыс тауып отыр. Бұл кәсіпті бұрынғы қалпында емес, заман талабына сай жаңғыртуда.
«Түйе – біздің даланың табиғатына, шөлге бейім жануар. Қуаңшылық кезде де шыдамды. Әкемнің ізін жалғағаныммен мен шаруашылыққа жаңаша серпін бергім келді. Түйлеріміздің тұқымын асылдандыра бастадым. Енді шұбат өндірумен қатар, туристік бағытпен де табыс тауып отырмын», – дейді жас кәсіпкер.
Ескендірдің айтуынша, соңғы жылдары Маңғыстауға әлемнің түкпір-түкпірінен келетін туристер түйеге, әсіресе оның өнімдеріне ерекше қызығушылық танытады. Емір маңындағы Ыбықты сай шатқалына келген туристер ауылға арнайы келіп, ақтан дәм татып, түйеге мінеді. Ақ жаулықты аналар бауырсақ, құртын ұсынса, Ескендір туристік бағытты дамытып, ауылды танымал ету үшін домбырамен ауыл тұрғындары болып ән салып қошеметпен күтіп алады екен. Меймандардың түйемен суретке түсулеріне, мінулеріне мүмкіндік беретін қызметті қатар көрсетеді.
Сондай-ақ мейрам, демалыс күндері теңіз жағалауында демалып жүрген жұртқа қызмет көрсетеді. Биыл облыстағы бірқатар тур агенттіктермен ресми түрде жұмыс істей бастаған.
«Туристер түйені көрсе баладай қуанады. Түйе біз үшін үйреншікті, ал олар үшін экзотика. Осыны неге табыс көзіне айналдырмасқа деп ойладым. Қазірдің өзінде пайдасын көріп отырмын», – дейді Ескендір Сардабеков.
Ескендір бүгінде қолмен сауу әдісін қолданып келеді. Дегенмен, алдағы уақытта түйе сауатын аппарат сатып алуды жоспарлап отыр. Ол үшін Франциядан тәжірибе жинап келуді немесе кәсібін дамыту үшін сол жақтан маман шақыру мүмкіндігін де қарастырып жүр екен.
«Шетелдік тәжірибе бізге ауадай қажет. Өндіріс жолға қойылса көлемді шұбат шығаруға болады. Бұл тұрақты табыс көзі, әрі ауыл азаматтарын жұмыспен қамтуға үлкен мүмкіндік. Французда тек сүт емес, әр түйеден пайда көрудің жолдарын біледі. Қазір түйе сүтінен бөлек, жүні, терісі де табыс көзі. Әр түйе – жеке ресурс. Біз де соған бет бұруымыз керек. Ауылда отырып-ақ үлкен кәсіп істеуге болады. Менің ойымша, түйе Маңғыстаудың брендіне айналуы тиіс», – дейді кәсіпкер жігіт.
Сурет: Маңғыстау медиа
