Оралда бірнеше жыл жұмыс істемей тұрып қалған тері өңдеу зауыты қайта іске қосылды, деп хабарлады жетінші арна. Ауыл шаруашылығы дамыған аймақ үшін бұл кәсіпорынның маңызы зор. Өткізетін жер болмай далада жатқан мал терісі енді кәдеге жарайды.
Тері мен жүн өңдеу мәселесі еліміз бойынша өзекті. Бұған дейін ашылып, қаражат, шикізаттан туындаған мәселеден кәсіпорын жабылып қалған. Ираннан келген инвестор зауытқа қызығушылық танытыпты. Бірінші кезеңде осы мақсатқа 1 миллард теңге көлемінде қаржы жұмсалмақ. Алдағы уақытта тағы да жаңадан 30 жұмыс орны ашылмақ. Өңдеу процесі екі ауысымда жұмыс істейтін болады. Облыстың өзінен жылына 200 мың бас ірі қараның, 430 мың ұсақ малдың терісі шығады. Бұдан бөлек сырттан да тасымалданады. Зауыттың толық қуатпен жұмыс істеп, дайын өнімдер шығаруына шикізат қоры жеткілікті.
«Күніне мың тері шығып жатыр. Қуаттылығы күніне үш мыңға дейін. Терілерді аудан, ауылдардан жинап жатырмыз. Ақтөбе облысынан 2-3 күнде 1 фура келді», — дейді зауыт директорының орынбасары Аманғали Шаяхметов.
Ұзақ жыл тұралап қалған кәсіпорын қайта іске қосылғалы өңделген өнімнің алдыңғы легі Иран, Түркия еліне экспорттала бастаған. Зауыт толық қуатқа көшкен кезде жылына 182 мың ірі қараның, 624 мың ұсақ малдың терісін өңдей алатын болады. Болашақта жүн өңдеу цехын ашу да жоспарланған.
