Қазақстанның агроөнеркәсіптік кешенін орнықты дамыту стратегиясы аясында үш негізгі бағыт айқындалды, олардың ішінде отандық тұқым шаруашылығын дамытуға ерекше көңіл бөлінуде, деп хабарлайды Ауыл шаруашылығы министрлігінің баспасөз қызметі.
2015-жылдан бері Ұлттық аграрлық ғылыми-білім беру орталығы мен оның еншілес ұйымдары 686 ғылыми жоба әзірледі, оның 465-і өсімдік шаруашылығы саласында.
Соңғы сегіз жылда ғалымдар дақылдардың 326 сорты мен будандарын өсірді, олардың 37%-ы дәнді дақылдар. Барлық сорттар мемлекеттік сынақтан өтіп, тізімге енгізілді.
Отандық селекцияның тұқымдары фермерлер арасында үлкен сұранысқа ие. Мысалы, Қарағанды облысында егіс алқаптарының 99%-да отандық тұқым егілді.
Биыл жоғары нәтиже көрсеткен «Таймас», «Дамсинская 2017» астық нарығындағы танымал сорттардың қатарына енді, сондай-ақ «Алтай 1» күздік бидай және «Өскемен» күздік қара бидайлары жақсы көрсеткішке ие болды.
Қазақстандағы егіс алқаптарының 80 пайызын отандық тұқыммен қамту мақсатында ҰАҒББО 14 мың тонна суперэлиталық тұқым өндірді. Алдағы екі жылда бұл көлемді 40 мың тоннаға жеткізу жоспарлануда.
Сурет: АШМ
