Ауыл шаруашығы вице-министрі Бағлан Бекбауов орталық коммуникациялар қызметінде өткен баспасөз мәслихатында электронды нұсқада берілген субсидия өтініштерінің жартысына жуығы мақұлданбағанын айтты, деп хабарлайды ҚазАқпарат.
«2024 жылғы 1 қазандағы жағдай бойынша, жүйе арқылы 254 млрд теңге сомаға 123 мыңнан астам өтінім беріліп, 67 080 өтінім мақұлданды. Мал шаруашылығы секторында сүт пен еттің құнын арзандатуға арналған субсидиялар жоғары сұранысқа ие. Сондай-ақ, ауыл шаруашылығы техникасын және өсімдіктерді қорғау құралдарын сатып алудың өскені байқалады», — деді вице-министр.
Бағлан Бекбауов «Ауыл аманаты» бағдарламасына қатысушылардың өтініші де электронды жүйеде қабылданатынын айтты.
«Бағдарламада мал шаруашылығын, өсімдік шаруашылығын, ауыл шаруашылығы кооперациясын, сондай-ақ ауыл шаруашылығына жатпайтын бизнесті дамытуға 2,5% пайыздық мөлшерлемемен шағын несие беру көзделеді. Бағдарлама аясында кооперативтер құруды ынталандыру үшін ауыл шаруашылығы кооперативтеріне ең жоғары сомасы 8 мың айлық есептік көрсеткішке (29,5 млн теңге-ред.) дейін кредит беру қарастырылған», — деді ол.
Министрліктің дерегі бойынша, «Ауыл аманаты» жобасы іске асырыла бастағаннан бері өңірлерде 400-ден астам кооператив құрылған.
Белгілі сарапшы, «Ауыл» партиясы төрағасының бірінші орынбасары Төлеутай Рахымбековтің айтуынша, кейінгі 22 жылда ауыл шаруашылығына бюджеттен бөлінетін субсидия көлемі 150 есе өскен.
«Жалпы ауыл шаруашылығына мемлекет тарапынан қомақты қаржы бөлініп отыр. Субсидияның өзі 500 млрд теңгеге жетті. Мысалы, 2002 жылы салаға бөлінетін субсидияның көлемі 3,5 млрд теңге болатын. Содан бергі 22 жылдың ішінде 150 есе өсті», — дейді сарапшы.
Фото: freepik.com
