2026 жылға дейін елдегі мақта алаңы 36,4 мың гектарға, күріш алқабы 14,1 мың гектарға қысқарады, деп хабарлады primeminister.kz. Жоспар суды көп қажет ететін дақылдарды азайтып, су үнемдеу технологияларын енгізу және егістерді әртараптандыру бағдарламасы аясында іске асады. Бұл туралы Үкімет отырысында айтылды. Олжас Бектенов биылғы вегетациялық кезең су ресурстарының тапшылығынсыз өткенін атап өтті. Үнемдеу технологияларын қолдану да оң нәтиже берген.
«2026 жылға дейін мақта алқаптарын – 36,4 мың гектарға, күріш алқаптарын – 14,1 мың гектарға қысқарту жоспарлануда. Өткен жылмен салыстырғанда күріш алқабы 2,2 мың гектарға қысқарып, 98,1 мың гектарға дейін жеткізілді, мақта егетін алқап 10 мың гектарға қысқарып, 106,4 мың гектар болды», — деп мәлімдеді Үкімет отырысында Ауыл шаруашылығы вице-министрі Азат Сұлтанов.
Қызылорда облысында коллекторлық суларды қайта пайдалану арқылы күріш алқабы 1,7 мың гектарға ұлғайтылып, 85,6 мың гектарға жеткізілді. Республикада су үнемдеу технологияларын енгізу ауыл шаруашылығы дақылдарының өнімділігін арттыруға мүмкіндік берді. Мысалы, өткен жылмен салыстырғанда күріштің өнімділігі 8 центнерге, қант қызылшасы 109 центнерге, картоп 51,5 центнерге және көкөністер 26,5 центнерге артқан.
«Биыл су үнемдеу тәсілдерін қолданған суармалы жерлердің ауданы 85,1 мың гектарға ұлғайтылды, сондай-ақ 57,6 мың гектар жер лазерлі жоспарлау құрылғысымен тегістелді. Жыл қорытындысы бойынша су үнемдеу технологияларын қолдану арқылы пайдаланылатын алқаптардың көлемі 150 мың гектарға дейін жеткізілетін болады», — деді вице-министр.
Сурет trendnews.kz
