Мемлекет басшысы биылғы халыққа Жолдауында ауыл шаруашылығына тың серпін беру үшін мемлекет соңғы жылдары реформа жүргізіп жатқанын айтқан еді. Соның ішінде биыл шаруаларды қолдауға бір триллион теңге жұмсалған. Қажетті несиелер уақытында берілгенін де Президент атап өтті.
«Қазір ауыл шаруашылығы өнімдерін терең өңдейтін бірқатар ірі жоба жүзеге асырылып жатыр. Көптеген аймақта өндірістің барлық сатысын қамтитын үздік агрокәсіпорындар бар. Олар ауыл шаруашылығы өнімін шығарудан бастап оны терең өңдеуге дейін тұтас өндірісті толығымен жолға қойып, зор табысқа жетіп отыр», — деді Мемлекет басшысы Қасым-Жомарт Тоқаев.
Елдің азық-түлік қауіпсіздігін қамтамасыз ету – стратегиялық міндеттердің бірі екені белгілі. Президент өз Жолдауында импортқа тәуелділікті азайтып, ауыл шаруашылығы өнімдерін терең өңдеуді дамытуды тапсырған болатын. «Бәйтерек» ұлттық басқарушы холдингінің еншілес компаниясы – Аграрлық несие корпорациясы кәсіпорындарға қаржылай қолдау көрсетуді жүзеге асырып жатыр. Мәселен, биыл сүт өнімдерін өндіретін «Эко Дом-Павлодар» ЖШС «Агробизнес» бағдарламасы бойынша алғаш рет төмен пайызбен несие алыпты және мұндай жеңілдетілген несиенің тиімді екенін айтады.
«Биыл бірінші рет несие алдым, қуанышымда шек жоқ. Жылдық мөлшерлемесі бар болғаны 5 пайыз екен. Шарттары өте тиімді. Әсіресе біз сияқты сүт өнімін өндірушілер үшін жаз айларында айналым қаражатына, сүт сатып алуға, өнім шығаруға үлкен көмек болды. Қоймаларда сақталып тұрған май мен қатты ірімшіктерге де осындай несие алу — нағыз бақыт», — дейді «ЭкоДом-Павлодар» ЖШС директоры Марина Рейдина.
Аграрлық несие корпорациясынан алғаш рет төмен пайызбен несие алған тағы бір павлодарлық компания — «Best Milk» ЖШС. 2016 жылдан бері сүт өнімдерін шығарып келе жатқан кәсіпорын бүгінде күніне 15 тоннаға дейін сүтті өңдеп, балабақша, мектеп пен ауруханаларға жеткізеді. Қазір мұнда 130 адам еңбек етеді.
«Біз 2,5%, 3,2%-дағы әртүрлі майлылықтағы сүт өндіреміз. Сондай-ақ қайнатылған сүт, айран, майлы айран, түрлі қаймақ пен сүзбе, сүзбешелер мен ерітілген сырлар бар. Қазір біз мемлекет стандарты бойынша жасалған жоғары сапалы 72,5 пайыздық май өндіреміз. Өнімдеріміз Астана, Семей, Өскемен, Көкшетау және өзге де қалаларға жөнелтіледі», — дейді «Best Milk» ЖШС директорының орынбасары Оксана Казанжи.
Айта кетейік, Аграрлық несие корпорациясы 2024 жылдан бастап «Агробизнес» бағдарламасы аясында азық-түлік өндірісі мен ауыл шаруашылығы шикізатын қайта өңдеуді қаржыландыруды бастаған.
«Қазір 60 өнім өндірушіге 24 млрд теңге берілді, 10 млрд теңгенің өтінімдері мақұлданды, тағы 10 млрд теңгенің өтінімдері қаралып жатыр. Биылғы жалпы қаржыландыру көлемі 44 млрд теңге», — деді «Аграрлық несие корпорациясы» АҚ Басқарма төрағасының орынбасары Тимур Аяпбергенов.
Аграрлық несие корпорациясы кәсіпкерлерге қаржылай қолдау көрсетіп, импортқа тәуелділікті азайтуға үлес қосып келеді. Осының нәтижесінде табиғи таза отандық өнім көлемі артады. Бұл ел экономикасының өсуіне және халықты сапалы азық-түлікпен қамтамасыз етуге мұрындық болатын мақсатты қадамдар.
Сурет: Agrotrend.kz
