Солтүстік Қазақстан облысының Қызылжар ауданында малға арналған жоңышқадан жем өндіретін зауыттың құрылысы жүріп жатыр, деп хабарлады Ауыл шаруашылығы министрлігінің баспасөз қызметі. Жобаны «Salar Farm» ЖШС «Солтүстік» әлеуметтік-кәсіпкерлік корпорациясы» АҚ-ның қолдауымен жүзеге асыруда.
Кәсіпорынды 2026 жылдың көктемінде іске қосу жоспарланып отыр. Зауытта жоңышқаны өңдеудің толық технологиялық тізбегі енгізіледі. Атап айтқанда, шөпті жасанды жолмен кептіру, престеу және түйіршіктеу.
«Жоңышқаның басты артықшылығы — құрамында ақуыз бен протеин жоғары болады. Бұл — премиум санаттағы жем, біз оны Қытай мен БАӘ-ге экспорттауды жоспарлап отырмыз. Жоңышқаны өзіміздің суармалы алқаптарымызда өсіреміз», — деді компания директоры Арман Уатаев.
Кәсіпорын жылына 60 мың тонна дайын өнім шығаратын болады. Барлық процесс автоматтандырылады. Жобаның жалпы құны шамамен 5 млрд теңге.
Сурет: АШМ
