Петропавл қаласында ғылыми мекемелердің, тұқым шаруашылықтарының, ауыл шаруашылығы тауар өндірушілерінің, сондай-ақ аграрлық сектордағы отандық және шетелдік компаниялардың өкілдерін біріктірген ІІ халықаралық «Тұқым-2026. Қызылжар» конференция-көрмесі өтті. Бұл туралы Ауыл шаруашылығы министрлігі хабарлады.
Салалық кәсіби алаң тұқым шаруашылығын дамытудың өзекті мәселелерін, егістік материалдарының сапасын арттыруды, заманауи агротехнологиялар мен цифрлық шешімдерді агроөнеркәсіптік кешенге енгізу жолдарын талқылау мақсатында ұйымдастырылды.
Іскерлік бағдарлама аясында қатысушылар саланы мемлекеттік қолдау, селекция және сорттарды жаңарту, гибридті және элиталық тұқымдарды қолдану, сондай-ақ ауыл шаруашылығының орнықты дамуын қамтамасыз етудегі ғылымның рөлі мәселелерін қарастырды. Инновациялық шешімдерді енгізудің практикалық тәжірибесіне және аграрлық өндірістің тиімділігін арттыруға ерекше назар аударылды.
Көрме экспозициясында аграрлық секторға арналған тұқым материалдарының кең ауқымы, ауыл шаруашылығы техникасы, цифрлық шешімдер мен технологиялық әзірлемелер ұсынылды.
Көрмеге барлығы 50 компания қатысып, әртүрлі топырақ-климаттық жағдайларға бейімделген 150-ден астам тұқым түрін таныстырды.
Сурет: АШМ
